Gosodiadau hysbysebu

Gall popeth a wnawn ni ar-lein adael ychydig o ôl troed digidol. Yn aml, dyw plant ddim yn sylweddoli y gall cwmnïau gasglu a defnyddio’u gwybodaeth bersonol i adeiladu proffil amdanyn nhw a siapio’r hysbysebion maen nhw’n eu gweld ar-lein.

Fe allai’r broses o gasglu data:

• amlygu’ch plentyn i hysbysebion sy’n hybu ymddygiadau niweidiol fel cyngor camarweiniol ynghylch maeth neu ddewisiadau ffordd-o-fyw sy’n amhriodol iddyn nhw; 
• agor y drws i hysbysiadau marchnata ymwthiol sydd wedi’u cynllunio i hybu cynhyrchion; 
• annog eich plentyn i wario arian trwy brynu o fewn yr ap neu dal am uwchraddiadau; ac 
• arwain at rannu gwybodaeth bersonol eich plentyn gyda llawer o drydydd partïon, gan leihau eu gallu i reoli sut mae eu data’n cael ei ddefnyddio. 

Ydw i’n gallu rheoli gosodiadau hysbysebu?

Mae gan y rhan fwyaf o apiau, gwefannau neu gemau symudol osodiadau hysbysebu, cwcis neu osodiadau marchnata yn eu dewislen ‘Settings’ neu ‘Account’.

Mae’r gosodiadau hyn yn rheoli:

• a gaiff yr apiau gasglu gwybodaeth bersonol eich plentyn ac olrhain eu gweithgarwch ar draws llwyfannau a gwefannau;
• a fydd eu gwybodaeth bersonol yn cael ei rhannu gyda hysbysebwyr eraill; ac
• a gaiff hysbysebwyr dargedu’ch plentyn ar sail eu diddordebau, eu demograffeg, eu hymddygiad, neu eu patrymau defnyddio apiau.

Anogwch eich plentyn i fod yn wyliadwrus ynglŷn â cheisiadau am hysbysebion, cwcis neu farchnata ‘wedi’u personoli’ neu ‘wedi’u targedu’ pan fyddan nhw’n cyrchu ap, gwefan neu gêm symudol newydd. Ar ddyfeisiau Apple, mae gosodiad ‘Tracking’ ar lefel y system hefyd, ac mae gan ddyfeisiau Android ‘Opt out of ads personalisation’.